舊文章搜尋

2010年1月29日

我無去過火星,寫不出稿子來

踏出自由人第一步,已做好了心理準備,就是白眼。今天去一個Function就給我遇了!

首先我要澄清不是主人家對我不禮貌,主人家非常熱情,而是某雜誌的某位高層給我送上的。故事是這樣的:

見面,禮貌地跟她問好。

她說:乜你今年無去表展咩?(狀甚詑異)
我說:無呀,我現在都無在貴集團任職了,自由身。
她說:哎吔,我仲想搵人寫表展添。
我說:我都可以幫到你的。(一副r撈格)
她說:車,你都無去,我想搵d 有去的人寫。你有無人介紹我呀?
我說:你公司大把人去啦,使乜外求呀?(極度火滾,但抑壓自己的情緒)
她說:佢地邊得閒寫呀,自己都大把野做。咁好啦,搵唔到人時再找你幫我寫啦。
我說:哦,好呀。再講啦。bye!(已怒火衝上頭頂)

真係唔該晒~

我明,有去就有所謂現場感,但無去,又是否寫不出好文章?旅遊記者也有很多地方沒親自到過,他們是否去過火星,去過北極?去過大西洋?即使貴集團也有很地方沒去過啦,還不是一樣要寫旅遊稿?

如此狂言出自經驗豐富的高層口中,在在反映她的無知。不過也多謝她的直率,讓我知道世途險惡。有得寫,當然開心,無得寫,又不用乞食。何況該集團出名拖欠稿費,寫與不寫,也要認真考慮。

7 則留言:

  1. 你幾時開班受教EQ先﹖俾我車左"kui"啦~~

    高層﹖撻落地下"kui"就知.....他朝君體也相同(痛)!

    回覆刪除
  2. "主人家好熱情"..會唔會係我o黎家...哈哈!唔好理o的衰人啦...

    回覆刪除
  3. 作為過來人,完全明白,撐住!

    回覆刪除
  4. 我是一個「路過」的做旅遊稿writer, 我可以話畀你聽, 做旅遊的記者, 真係去咗邊就先會寫返出嚟. 去咗芬芬蘭北極圈我就寫返芬蘭北極圈(事實上真係有好多人去過架), 去咗紐西蘭做wwoofer就會寫番出嚟囉。依家傳媒競爭咁大,老細唔會肯收「炒稿」,尤其係無去過嘅地方,亦唔興問旅遊局攞相然後憑空想像發白日夢遊埠,問得旅遊局,就係會直接了當地問佢哋:「喂honey幾時搞fam tour先?」仲有,好多media自己啲記者唔可以動身出trip, 但都有旅遊稿出街,咪就係會請freelance出trip, 又或者問佢哋之前有乜稿剩、去過乜地方可以寫吓囉。暫時無人請我哋去火星(連布蘭森都未搞宇航fam tour,呢排美國又國庫空虛, NASA十年八載內都唔會搞架嘞), 所以咪無寫囉, 寫火星的通常也不會是旅遊版行家, 多數應該是國際版的翻譯員譯稿啫。同埋我好想講你知,「現場感」的確係有嘅,千祈唔好咁講啲旅遊版行家, 佢哋一個月飛兩三次做到嘔, 喺飛機上都要趕稿, 無非都係為咗寫出旅程上的現場感受。你做咗呢行咁多年,唔通真係一個半個旅遊版記者都唔認識?唔知道佢哋係真係去到現場又影又採?你如果係行外人, 有咁嘅諗法, 我唔會怪你。

    回覆刪除
  5. TO 匿名...旅遊稿writer

    你入行後一段仔都無炒過?
    如果係,我真係好想認識下你的大作呀!!
    同埋未去過炒稿又有乜大問題呢?慘得過炒得好又有人睇!你所謂的親身感受過先寫得出的文章,又唔代表好文章喎~~
    你樣樣野要親身試過先寫,咁你唔好轉工啦,我驚你寫時裝未著過寫唔到,寫食未食過又寫唔到,寫親子無綿仔女又寫唔到....
    旅遊 writer....真係辛苦晒!!!!!!

    撐你

    回覆刪除