舊文章搜尋

2016年3月9日

留得青山在 俾信心跨過去



近日不斷有學童自殺的新聞,我身為姑姐和姨姨,又是業餘小老師,真的很心痛難過。





想當年,我中學時也因為學業成績(看似)升班不理想,也傻傻地有一刻做傻事的念頭,但只係一瞬間,好彩無實行到咋。因為我無膽死,同埋唔想父母傷心,所以鼓起勇氣面對。

其實件事好簡單,就係本來讀1B,但因為考得好,升左去精英班2D,但F3時,又因為其他同學太強,搞到我跌咗去3A!!!當年係E班最叻,A班最......對一個十幾歲學生來講,學業係重要,「塌班」係人生中最大挫折,簡直係天跌落黎咁嚴重。但好好彩,3A的同學係「傻」的,我哋一齊玩到癲一齊上堂,加上佢地又唔係超級勁的同學(唔好打我),我只係稍為勤力,就竟然係同學仔的眼中的高材生。any肥,自問都算係乖學生,溫書時溫書,遊戲時遊戲。

不過我去3A最大得著,係識著呢班同學仔,到今日已經相識超過2X年,我地定期會KEEP住定期面見,上個星期先至團拜完,佢地係一生中最親密的好朋友之一。

然後到中五,我又好唔好彩要repeat,但當年打擊又無咁大喎,唯有repeat果年將勤補拙,最後我終於順利升原校中六,兼最後入到心儀的浸大新聞系。

講到入浸大,我成日都話,連我呢啲成績唔標青的學生都收,將個curve拉低咗,但問心又真係好好彩兼神奇。到今日,我仲做緊我喜歡的工作,靠寫作維生,雖然搵唔到大錢,就總算是活得開心。

其實我講咁多野,只係想借呢個機會講,一時的挫折唔係天大的問題,天下間亦沒有解決唔到的事,所有不如意只係人生中極細微的小插曲,咬緊牙關,俾信心跨過去!話比自己聽:你得既。到時又會有另一片天。

順帶想向各位家長,學生和教師推介一套電影《奇蹟補習社flying Colors》。電影的訊息很簡單明確,作為家長的,就是要給予子女大大力的支持,不要給過份的壓力,也不要將自己的夢想投射給孩子身上;作為教師的,要因材施教,如果只為學校的排名,很多遲發力的學生就會被埋沒,只要給予鼓勵和放棄填鴨式的教學,引導學生發掘自己的目標,一定可以大發異彩。還有,作為學生的,就算人家當你「臘鴨」(垃圾),也不要把自己看扁,問自己到底出了多少力?如真的想成功,就要努力發奮,唔好衰俾人睇,因為你要發力,外人其實是阻住唔到你的!!

同埋最希望香港政府可以嚴肅正視教育問題,我實唔希望再睇到呢類新聞,一單都嫌多。


沒有留言:

張貼留言